*Wọ́n lọ́rọ̀ ẹnu ló kóbá a
Kayọde Ọmọtọṣọ
Ọwọ ajọ ọtẹlẹmuyẹ ilẹ wa (DSS), ti tẹ ẹni to ti figba kan ri jẹ ọga awọn awakọ nipinlẹ Ọyọ, Mukaila Lamidi, tọpọ eeyan tun mọ si Auxilliary.
Gẹgẹ bi GBÉLÉGBỌ́ ṣe gbọ, nnkan bii aago mẹrin irọlẹ ana, ọjọ Iṣẹgun, Tusidee, ni wọn mu un nile rẹ to wa ni Olodo, niluu Ibadan. Akọroyin wa gbọ pe o ṣee ṣe ko jẹ ifọrọwerọ kan ti Auxilliary ṣe pẹlu gbajumọ sọrọsọrọ nni, Ajibọla Akinyẹfa, laipẹ yii ninu eyi to ti dunkooko mọ ẹni to jẹ oluranlọwọ Gomina Ṣeyi Makinde, iyẹn Ṣẹyẹ Famojurọ, pe oun lo wa nidii iṣoro toun n koju.
Tẹ o ba gbagbe, ninu iweeroyin wa tọsẹ yii lati mu un wa fun yin pe Auxilliary
tu awọn aṣiiri nla kan lasiko to ṣe ifọrọwerọ pẹlu gbajumọ oniroyin kan niluu Ibadan. Ṣe ni Auxilliary ni ko si aniani nibẹ pe ẹgbẹ oṣelu Peoples Democratic Party (PDP), o moore rara nitori ibi ni wọn fi san ẹsan awọn iṣẹ toun ṣe fun wọn.
Nigba to n sọrọ lori eto idibo ijọba ibilẹ ti wọn di kọja nipinlẹ Ọyọ, o ni “ti ẹgbẹ oṣelu alatako kan ba loun fẹẹ dije nibi ibo ijọba ibilẹ, iru ẹgbẹ oṣelu bẹẹ kan n tan ara rẹ jẹ ni. Lati aye Adedibu ni mo ti n tẹle awọn oloṣelu, ko si ẹgbẹ alatako to le wọle ibo ijọba ibilẹ rara. Idi ni pe nigba ti wọn wa nijọba, wọn ko jẹ ki ẹgbẹ alatako kankan naa o wọle nigba naa. Awọn agba lo ni ti wọn ba fun were lọkọ, ọdọ ara rẹ ni yoo roko si. Gomina ti o ba gbọn nikan ni yoo jẹ ki ẹgbẹ alatako o wọle ibo ijọba ibilẹ nipinlẹ rẹ. Ko si ẹgbẹ alatako to le ba wa dije ti yoo wọle dipo bẹẹ a maa ri pe wọn jẹ gbese bọ ni. Ẹgbẹ PDP ni mo ṣiṣẹ fun nibi ibo ijọba ibilẹ to kọja ṣugbọn wọn o jẹ ki n jẹ ere wọn rara.”
Auxilliary, nigba to n ṣalaye idi to tun fi ṣiṣẹ fun ẹgbẹ PDP lai naani bi wọn ṣe ṣakọlu si ile rẹ, o ni “ẹnikan ni ko jẹ ki n jere gbogbo wahala ti mo ṣe fun Gomina Ṣeyi Makinde, onitọhun si ni Ṣẹyẹ Famojuro lọ. Mo mọ pe mo ṣiṣẹ fun Makinde ṣugbọn Famojurọ ni ko jẹ ki n jere gbogbo wahala mi. Bi Ọlọrun ṣe kọ kadara mi niyẹn ṣugbọn mo dupẹ pe wọn o ri mi pa. Mi o lẹsan kankan ti mo le gba lori gbogbo dukia mi ti wọn bajẹ ju pe mo fọrọ mi le Oluwa lọwọ lọ.”
Read Also: Sẹ́nétọ̀ Ládọjà ti fagilé ẹjọ́ tó pè ní kóòtù, ìgbáradì fún Olúbàdàn tuntun bẹ̀rẹ̀
O ni ọpọ ninu awọn ọmọlẹyin oun, paapaa, awọn ti wọn n jẹun pẹlu oun ni wọn ditẹ mọ oun, ti wọn si gbabọde foun. O ni “ọpọ ninu awọn ti wọn n jẹun pẹlu mi lo gbabọde fun mi. Gbogbo ẹni ti mo ṣe loore, to ditẹ mọ mi ni yoo kẹsan rẹ. Loootọ, Ọtunba Ṣẹyẹ ti ṣe mi loore to pọ ri ṣugbọn oun kọ lo mu mi de ọdọ gomina gẹgẹ bi wọn ṣe n sọ. Inu ile mi to wa ni Olodo ni wọn ti waa ba mi pe Sunday Igboho maa n da awọn laamu nigba ti awọn ba lọọ ṣe ipolongo ibo, to si jẹ pe miliọnu kan aabọ Naira lo maa n gba lọwọ awọn lẹyin ipolongo ibo kọọkan. Ṣẹyẹ yii ni Ṣeyi Makinde ran si mi nigba naa, emi pẹlu gomina si pade nileetura kan to wa lẹgbẹẹ ile rẹ to wa ni Bodija. Loootọ, mo tẹle wọn, mo si ba Igboho nita pẹlu awọn ọmọ rẹ, ṣe ni mo sọ fun Makinde ko jẹ ki n ba a ba Igboho sọrọ, ko ba a ṣiṣẹ ṣugbọn o loun o fẹ ẹ, emi loun fẹ. Mo tẹle wọn lọ ipolongo ibo kan laduugbo Ọrẹmeji, bayii si lemi ati Makinde ṣe bẹrẹ ọrẹ wa.”
O tẹ siwaju pe latigba toun ti n tẹle Adedibu, oun o ba ijọba kankan ṣadehun ri ju pe ki wọn jẹ ki oun maa daabo bo wọn lọ, bẹẹ ko si akọsilẹ adehun kankan laarin oun pẹlu gomina.
Lori ohun to fa ija laarin oun ati gomina, o ni “mo ti ni awọn ọga kan, iyẹn Alaaji Tokyo, ti mo tẹle ri ti ko fẹ ki awọn ọmọlẹyin rẹ o ga. Iru ọrọ yii lo ṣẹlẹ ni saa keji Makinde. Awọn eeyan n sọ fun mi pe ohun ti Ṣẹyẹ ṣe fun mi, Ṣeyi mọ si i, ṣugbọn mi o gbagbọ. Emi ni maa le Ṣẹyẹ pada si ilu wọn ni Ijẹṣa lọhun-un nitori ko le waa maa fọwọ lalẹ fun wa nibi. Ọdun kan ko ku ni pẹẹ pe, awọn ni wọn maa fi ijọba silẹ, emi ṣi maa wa nibi ti mo wa, mi o si ni i kuro niluu Ibadan. Mi o le tori ọrọ emi ati Makinde kuro ninu ẹgbẹ PDP, bẹẹ mi o si le bẹbẹ laelae. Emi Auxilliary o le bẹ Ṣẹyẹ laelae nitori mi o gbowo lọwọ rẹ. Ṣẹyẹ o ki i ṣe Ọlọrun, ohun ti Baba Adedibu o fi pe ara rẹ ni Ọlọrun fun wa nigba to wa laye, Ṣẹyẹ o ki i ṣe Ọlọrun. Mi o le bẹ gomina nitori oun gan-an mọ pe mi o ṣẹ oun.
“Ko sohun ti Ṣẹyẹ Famojurọ fẹẹ ṣe fun mi ju eyi to ti ṣe yẹn lọ, o ti ba ileeṣẹ mi jẹ, o ti ni ki kootu o ti pa, o tun ni ki wọn gbẹsẹ le akaunti mi, ẹni ti eeyan ba pa ti Ọlọrun o pa o le ku. Wọn o le ri mi pa nitori awọn ọsẹ meji to tẹ ilu Ibadan do o ni i gba. Mo n rẹkẹ rẹ ni ki iṣejọba wọn pari, ko duro ka jọ maa ba Ibadan lọ. Ohun to ṣe fun mi, gbogbo ara Ibadan lo ri i, ẹ lọọ wo ileetura mi ti mo ti kọ tipẹ, ẹ wo bi wọn ṣe ba a jẹ, bi mi o ba lagbara, Ọlọrun ni in. Nnkan to n ru mi loju ninu iṣejọba Makinde ni pe mi o mọ boya Famojurọ ni ọga ni tabi gomina.”
Nigba to n sọrọ lori ẹsun ti wọn fi kan an pe o maa n ko pankẹrẹ rin nigba to wa nipo alaga, o ni “ko sẹni to fi ẹjọ mi sun ọlọpaa ri pe mo lu oun. Lẹyin igba ti awọn ọmọ ẹgbẹ APC, paapaa, Tẹslim Fọlarin, dẹ ajọ ọtẹlẹmuyẹ (DSS), si mi lati ilu Abuja bii ẹẹmeji, to dẹ awọn Federal SARS si mi bii ẹẹmẹta, Ṣẹyẹ Famojurọ lo buwọlu u pe ki n maa ko eeyan rin. O ni ti a ba pọ, wọn o ni i le ṣakọlu si mi. Ṣebi ninu awọn to n tẹle mi yii ni wọn jọ n ṣepade lori mi bayii. Ṣuugbọn wọn o mọ ohun to n jẹ ogun ni nitori ọpọ ninu awọn ti a jọ n ṣejọba lọwọ yii lo jẹ pe awọn ọmọ ẹlẹran, kafinnta atawọn mi-in lo pọ ninu wọn. Ọpọ ninu wọn lo ṣepade le mi lori, ti wọn si pada dalẹ mi. Eyi ti wọn n pe ni Tommy (alaga ẹgbẹ PMS lọwọlọwọ), to n janu kiri yẹn, ẹ maa wo atubọtan rẹ, ṣugbọn mo fa oun naa le Ọlọrun lọwọ, afi bi mi o ba ṣe daadaa fun un.”
Tẹ o ba gbagbe, loṣu karun-un, ọdun to kọja ni awọn ọlọpaa kọkọ kede pe awọn n wa Auxilliary, ẹsun ti wọn si fi kan an nigba naa ni pe o da omi alaafia ilu ru lẹyin ti Makinde tu igbimọ PMS to jẹ alaga rẹ ka.
